今日行新商場K11 Musea，個商場設計都幾靚，最鍾意係佢有超多食店，唔止係餐廳，仲有好多唔同既小食/咖啡/麵包/飲品/雪糕/甜品店，啲舖頭唔係平時行其他商場成日見果幾間，所以對我黎講都幾有新鮮感🤩。平時好少一家大細去尖沙咀，因為人多車多，基本上去親都只會去海港城但啲餐廳食到悶，而家有個新場令我有興趣多啲去尖沙咀啦，加上個場算kids friendly，可以一家大細去密啲~
帶一心一意玩新既Donut Playhouse，愉景新城果間Donut Cafe係親子餐廳，不過呢間Donut Cafe只賣輕食，Playhouse係齋玩，$180包一大一細玩一個鐘，額外大人加$50。朝早11點開始，每半個鐘一節，基本上weekend都可以walk-in去玩唔使book。
Playhouse有3層樓高，由兩條幾刺激既滑梯貫通，每人每條滑梯限玩一次，不過如果對唔玩滑梯既小朋友黎講就唔多野玩，仲要限左每層逗留時間半個鐘，就算想提早落下一層玩都要等到夠鐘先可以😅。對一心一意黎講其實都幾嘥錢，因為滑梯要三歲以上先可以玩，一意玩唔到(連抱住一齊玩都唔得)，一心玩完第一條已經唔敢再玩下一條😂。中間果層其實主要係用大屏幕玩遊戲(但好快就玩完)，其他都係啲爬來爬去唔算好特別嘅設施。最底果層係一個大波波池，波波池算闊落同幾深，大人都可以被波波淹沒~
玩後感係: 我地用$360陪兩個小朋友玩左大約20分鐘波波池😂... 叫做試過一次就夠，如果小朋友唔玩滑梯就真係可以慳番，去商場個戶外遊樂場算啦~
#K11Musea
#Donutplayhouse
#親子活動最能振興香港經濟
Search